OPTUŽNICA Linemu Martinu 2008.

Eto danas sabrali se ljudi
nepoćudnem vragu da se sudi.
Dabogda mu zatrlo se sime
Lini Martin njegovo je ime.
Puno put je on nam digal živac
za zlo svako on je danas krivac.
Sada su mu odbrojani dani
za sve ča je napravil nam lani.

Godina nam prošla dobra bila
dobili Oštarci pedofila.
U novine ime nisu dali
morda se i s Martin pofali.
Kud nam ovde dela stalno štetu
dila slike i na Internetu.
Samo dilaj moj Martine ludi
i zbog tega ti se ovde sudi.
Bil si peder, a sad si pedofil
bogme i ti brzo minjaš profil.

Ča god dojde od nas brzo ode
tako su nam pobigle i rode.
Kad vidiše ča se ovde dela
pobigoše iz našega sela.
Kod nas opstat baš nemore niki
bolje jim je doli u Afriki.

Za Veliku mašu, to već znate
bil je kod nas onaj Bulić Mate.
Ljudi dosta kej uvik je bilo
a bogme se dosta i popilo.
Svi su pili kuliko su tili
samo zaštitari žedni bili.

Sve se više piva iz sveg glasa
otkad dela disko kod Mikasa.
Muzika mu ni baš jako lipa
čudan disko, samo cajka cipa.
Velu da to mladim jako godi
čudna mladež, Bože oslobodi.

Za izbore kej u kakvem ratu
jedni druge samo dobro blatu.
U tem ratu dvi se stranke boru
da dobiju prevlast u Saboru.
Nakon svega smirile se strasti
jerbo isti opet su na vlasti.

Glasal narod pa ga stigla kazna
navalila poskupljenja razna.
Sada nam je da nemore gore
poskupilo ča poskupit more.
Nisu krivi ni Sabor ni Vlada
nego onaj kem sudimo sada.

Niki ne zna kako bit i ča će
kad Evropa počme krojit gaće.
Odlučili naši da će zato
uključit se najprije u NATO.
Iz Evrope vojsku ćemo ranit
a naši će Afganistan branit.

Prokletstvo je svakeg našeg sela
nigdi neće niki niš da dela.
Jedino je tamo pisma druga
nanem brdu gori iznad Luga.
To se dela i snaša inventar
i gradi se novi sportski centar.
Al ji muči bogme jedna briga
centar dela ali nima sniga.

Dok Badanjak Kruno gori dela
došli dečki iz njegova sela.
Nisu dugo oni tamo bili
da ni zima sviću upalili.
Od sviće se upalil inventar
skoro ode u lagum cil centar.

Općinari napraviše dosta
popravili su tri stara mosta.
Sad se lipo novim mostom kiti
Miljevići i Ravnice siti.
A i treći sad je pisma druga
kad se vozi od centra do Luga.
Krenuli bi u projekte nove
da gospoda povrate dugove.
Treba oneg koji dobro krade
oslobodit plaćanja naknade.

Bit će bolje velu jedneg dana
kad ostvari projekt se pilana.
Jerbo tamo ekipa je jaka
okupljena oko Radeljaka.
Nisu oni nikem dat niš tili
vam gledaju kako bi drpili.
Samo neka njima dobro bude
baš ji briga za ostale ljude.

Ljudi živu kako kemu paše
Niki dela, niki bere flaše
Jadan onaj koji puno ima
kod njeg račun nikada ne štima
Stvar ne moreš ni zamislit crnju
puno dela, jedan bere vrnju

Uskok dela sve ča delat mora
uloviše čak i tri tenora.
Samo niki više i ne pita
ča je bilo oko Brodosplita.
I postupak onaj slabo stoji
u kem Zagi dijamante broji.
Bogme neznaš ča je kod nas luđe
il lopovi ili pravosuđe.

I osnovna škola naša mala
za cilim je svitom zaostala.
Ima ona nikuliko mana
a prva je, znamo svi dvorana.
Kadi treba udarit temelje
kej i do sad sadit će se zelje.

Kompjuteri su jim isto stari
pa ča onda, ki još za to mari.
Sad pod plata kej mrtvaci ležu
nespojeni na globalnu mrežu.
Jerbo danas nikemu ne smeta
ča u školi nima interneta.

Kad positiš Gavranović centar
uvik isti čeka te inventar.
Iza vrat je sa bocom od pive
svakeg dana naš zaštitar Ive.
Kad ga piva u tintaru kresne
skoči s stolca i rukami plesne.
Digne ruke naš zaštitar Iva
kej Gašparac Ćiro, pa zapiva.
Ima ništo u njegovu glasu
da sve cure padaju pod kasu.

U birtija naši, bože prosti
za šankom su vavik isti gosti.
Tamo sidu i nikud ne žure
bolje jim je da ganjaju cure.
Ima ništo ča ni jasno meni
ča se kod nas ljudi malo ženi.
Dečki kod nas pedeset komadi
niki stari, a niki su mladi.
Bilo bi i dice puno više
al' jim slabo ona stvar miriše.

Miljevići primili su stranca
oštarskega meštra od delanca.
Grozja ima samo parsto kila
al' je berba jako dobra bila.
Proizvodnja njegova je mala
cili vagon dobreg vina dala.

S nogometom kad ništo ne štima
Ludi Martin tote prste ima.
On je krivac tek da i to znate
ča ostavku dal je trener Mate.
U momčadi nima mira trena
dok je Bobo gospodar terena.

Nikemu ni bilo na pameti
da stoluje kod nas otac sveti.
Pitate se, dal vas morda kopa
ki to more prekrstit i popa.
Ima kod nas i pameni ljudi
ni pametan samo Martin ludi.

Vatrogasci ima skoro tristo
kad se dela vavik nam je isto.
Deset dela, a ostali nima
pojavu se tek kad dojde zima.
Psuju oca, mater mi i strinu
ča ji nisam pozval na skupštinu.
Svi bi tamo jako rado bili
svi bi mukte i jili i pili.
Jerbo lipo sidit je na bini
isti su kej i naš Martin lini.

Rešili smo se još jedneg vraga
ona krava prošla je iz Haga
Krivoj strani oće da ugodi
ubojice drži na slobodi
Prije nego dobila je otkaz
dala Hagu još je jedan dokaz
Kirin, Markač i ostala svita
u lovu su kej za vrime Tita
S Ju Bi Tu-om napravil je feštu
pa završil siromak u reštu

Tako nam još jedno lani ode
u Zagrebu piju masne vode
Diglo se je nikakove bure
kad je jedan čovik skrival ure
Bome svega bilo nam je lani
nastradali su i gruntovčani
Al' najveća katastrofa bila
pivovara se je zatvorila
Pivopije jako tužni bili
u gemištu tugu utopili

Za sve kriv si ti Martine ludi
zato te i vritnjakaju ljudi
Ne čeka te baš budućnost slatka
plakat ćeš nam kej Radeljak Vlatka
Jedva čeka da te se osudi
i uz mene ovaj biskup ludi
Maloprvo ti je već za probu
svojim šćapom poravnaval gobu.

Sudbina ti neće bit baš lipa
kad te ćapu Lećka i ekipa
Ni Del Ponte tebe neće spasit
štrik ćeš svojim vratom ti omastit
Zato ča si stalno gonil vraga
snimit će te Valdec i istraga
Kad te ovud ljudi budu vukli
i kej lani med mosti zatukli